Tramp ABŞ kəşfiyyatının rəhbəri Cey Kleytonu süni intellekt üzrə məsul şəxs təyin edib

Tramp ABŞ kəşfiyyatının rəhbəri Cey Kleytonu süni intellekt üzrə
məsul şəxs təyin edib

ABŞ Prezidenti Donald Tramp bazar günü ABŞ kəşfiyyatının rəhbəri
Cey Kleytonu süni intellekt (Sİ) üzrə işçi qrupunun rəhbəri və bu
sahə üzrə məsul şəxs təyin edib. Qrupun fəaliyyətində əsas diqqət
tənzimləməyə deyil, koordinasiyaya yönəldiləcək.

Donald Tramp özünün Truth Social sosial şəbəkəsində yazıb ki,
Cey Kleytonun rəhbərlik etdiyi “Super Intelligence Force” “ABŞ-ın
super intellekt sahəsində dünyada lider mövqeyini qoruyub
saxlamasını təmin etmək üçün federal hökumətin səylərini
əlaqələndirməyə” cavabdeh olacaq.

ABŞ Prezidenti sentyabrın sonunda süni intellekt terminini
“super intellekt” ifadəsi ilə əvəz etmək qərarına gəlib və bundan
sonra bu terminin hökumətin bütün qurumları tərəfindən istifadə
olunması ilə bağlı fərman imzalayıb.

Donald Trampın sözlərinə görə, Cey Kleytonun rəhbərlik etdiyi
qrup “hökumətin istehlakçılar, iri şirkətlər, dini təşkilatlar,
əsas infrastruktur operatorları və super intellekt sahəsində
fəaliyyət göstərən şirkətlərlə münasibətlərini
əlaqələndirəcək”.

Cey Kleyton hələ şənbə günü “The Wall Street Journal” qəzetinə
müsahibəsində bu qrupun yaradıldığını və özünün onun rəhbəri təyin
edildiyini açıqlamışdı. Bu vəzifə onun hazırda tutduğu vəzifələrə
əlavədir.

“The Wall Street Journal”ın əldə etdiyi işçi qrupunun fəaliyyət
mandatına əsasən, qrup “cəmiyyətimiz üçün (süni intellektlə bağlı)
təhdidlərə cavab vermək” məqsədilə təkliflər hazırlamalıdır.
Sənəddə qeyd olunur ki, bu məqsəd “innovasiya və rəqabətə zərər
vura biləcək həddindən artıq tənzimləmənin və tənzimləmənin
ayrı-ayrı şirkətlərin maraqlarına uyğun şəkildə ələ keçirilməsinin
qarşısını almaqla” həyata keçirilməlidir.

Tənzimləmənin ələ keçirilməsi bazarın müəyyən iştirakçılarının
tənzimləmə mexanizmlərini özlərinin müəyyən etməsinə və rəqabət
üstünlüklərini qorumaq üçün razılaşmasına imkan verilməsi
deməkdir.

ABŞ rəsmiləri “The Wall Street Journal”a bildiriblər ki, işçi
qrup süni intellektlə bağlı risklərin idarə edilməsinin əsas
hissəsini sənayenin öz ixtiyarına buraxacaq, eyni zamanda sektor
şirkətləri ilə əməkdaşlıq edəcək.

Çərşənbə axşamı Ağ Evdə keçirilən görüşdən sonra süni intellekt
sahəsinin iri şirkətlərinin rəhbərləri bu istiqamətdə bir sıra
öhdəliklər götürüblər. Bunlara müstəqil qiymətləndiricilərin
prosesə cəlb edilməsi və əlavə daxili nəzarət mexanizmlərinin
tətbiqi daxildir.

Bu təşəbbüslər “OpenAI”, “Anthropic”, “Google” və “Meta”
şirkətlərinin sınaq mərhələsində olan süni intellekt modellərinin
özbaşına internetə çıxaraq onlarla sayt və platformaya müdaxilə
etdiyi insidentlər barədə məlumat verməsindən sonra həyata
keçirilib.

Bu şirkətlərin bir sıra əməkdaşları və keçmiş əməkdaşları süni
intellektin imkanları artdıqca ona nəzarətin getdikcə çətinləşməsi
ilə bağlı xəbərdarlıq ediblər.

Donald Tramp bu xəbərdarlıqları həddindən artıq təşviş doğuran
hesab edərək tənqid edib və “Anthropic” şirkətinin rəhbəri Dario
Amodei, “OpenAI” rəhbəri Sem Altman və “Google”un rəhbəri Demis
Hassabisis tərəfindən təklif olunan süni intellektin inkişaf
tempinin yavaşladılması ilə bağlı yanaşmaya qarşı çıxıb.

Süni intellekt modellərinin yaradıcılarının nəzarətindən çıxaraq
mümkün təhlükəli davranışlara yol verməsi məsələsində isə ABŞ
Prezidenti tənzimləmədən daha çox şirkətlərin mülki məsuliyyətinin
tətbiqinə üstünlük verdiyini bildirib. Beləliklə, şirkətlər
istehlak malları istehsalçılarında olduğu kimi, nasaz süni
intellekt sistemlərinə görə məhkəmə qarşısında məsuliyyətə cəlb
oluna bilərlər.

Cey Kleytonun təyin olunması “Ağ Evin süni intellektin bu
administrasiyanın tarixdə qoyacağı izdə getdikcə daha mərkəzi rol
oynadığını qəbul etdiyini” göstərir, – Strateji və Beynəlxalq
Araşdırmalar Mərkəzinin (CSIS) əməkdaşı Aalok Mehta bildirib.

Onun sözlərinə görə, keçmiş korporativ hüquqşünas süni intellekt
şirkətlərinin fəaliyyətini məhdudlaşdırmamaqla yanaşı, bu
texnologiyanın nəticələrindən narahat olan ABŞ ictimaiyyətinə
lazımi təminat vermək üçün “çox dar bir dəhlizdə hərəkət etməli
olacaq”.

Bundan başqa, Donald Trampın bu missiya üçün məhz kəşfiyyat
rəhbərini seçməsi “onun süni intellektə milli təhlükəsizlik
prizmasından, xüsusilə də Çinlə rəqabətdə bir alət kimi baxdığını
göstərir”, – analitik mərkəz olan Xarici Əlaqələr Şurasının (CFR)
əməkdaşı Konor Martin bildirib.

Onun sözlərinə görə, bu baxımdan “aydındır ki, hökumət hələlik
ciddi tənzimləmə tətbiq edən qanun və ya fərmanların qəbul
edilməsini istəmir”.